RAZANA MANANIHANY...
Mba gaga amin’ireto razako ireto aho…fa dia tena mpananihany sy mpananihany tokoa izy ireto…ary mpampiasa teny miolakolaka sy midika roa matetika, asa na fialam-bala izany na tena tetika fifandraisana tsotra izao…
Raha mba misakafo any amin’ny olona raha iny mbola tsy lany iny …ka manontany ilay tompontrano hoe « ampiana ve sa… ? », dia mifangaro ny fanononana ny hoe
“Ampio…” sy ny “Ampy io..” Raha vao hita hoe misalasala ilay tompon-trano dia ahitsy haingana : “ampy io anie no noteneinko teo e…”
Ny Hendry marina mody voky fa ny adala manesika ihany… mandeha mody voky sa mipetraka mody voky?
Raha tsy misy mpaka vady iny rakalakely ka manjary ho lasa Rakala”be” dia lazaina fa “vodin-tsobika aza manan-tandrify…” …raha miteny ilay voatondro hoe “izaho izany vodin-tsobika?”…dia valian’ny haingana hoe “a a a, tsy VODIN-TSOABIKA ianao fa ireny ary manan-tandrify vao mainka ianao…”…efa mandinika elaela vao mahatsapa hoe FAKO no tandrifin’ny vodin-tsobika…
“Aleo very tsikalakalam-bola toy izay very tsikalakalam-pihavanana”…dia samy milaza fa aloe very vola toy izay miady…mandinika kely vao mahatadidy fa hay moa ny dikan’ny TSIKALA dia HAZO KELY ….. izany hoe “Aleo very vola kely toy izay very fihavanana kely” dia raha lazaina amin’ny fomba hafa “aloe tsy very vola be toy izay tsy very fihavanana be”…izany ka hoe tena tia fihavanana…
Raha maty aho Matesa Rahavana…fa raha maty Rahavana matesa Raomby (fa tsy izaho)…
Ny dikany “a a a” sy ny “ie” moa dia tsy hay itsony raha tsy averina indroa ny fanontaniana…
Raha malahelo dia tsy voatery “manana alahelo”…raha manana alahelo dia tsy voatery “malahelo”…
Raha mandry ka mandrimandry dia tsy “mody mandry”…fa raha nodimandry dia tsy mandry mihitsy…
Raha mahafatifaty ny zaza dia “alikalika kely”…fa rehefa manorisory izy dia mivadika “alika lahy na alika vavy”… …